صديقي اللي بتقرأ المقال دا هل تفتكر ان ممكن نشوف كوكب الأرض زمان !! بغض النظر عن اجابتك تعالي معايا في رحلة سريعة للاجابة عن التساؤل دا.
في البداية تعالي نعرف ايه هو الضوء, الضوء عبارة عن اشع بتنتقل في خط مستقيم من مصدرها لغاية لما حاجة تقطع طريقها او توصل عند مرحلة معينه و تختفي و دا علي حسب قوتها و حجات تاني كتير فبالتالي الضوء علشان ينتقل من مكان لمكان لازم يقطع مسافة و طبعا بسرعة معينه و هي سرعة ثابته تقدر تقريبا 300 ألف كيلو متر للثانية!! ف دا بيساعد الضوء الانتقال لمسافات طويلة بسرعة رهيبة, بعد كدا لما العلم اتطور عرفنا ان الضوء اللي بيوصلنا من الشمس دا ضوء خرج من الشمس من 8 دقائق يعني الضوء قطع المسافة اللي بين الشمس و الأرض في 8 دقائق بس و المسافة دي تقدر ب 150 مليون كيلو متر !!.
طيب انا ليه بحكيلك كل القصة الطويلة دي اللي تبان للبعض مملة؟
علشان العلماء اكتشفوا اننا نقدر نشوف ماضي الأرض يعني نقدر نشوف مباشر انقراض الديناصورات و نقدر نشوف الأهرامات ازاي تم بناءها و دا بعد معرفة اننا نقدر من خلال اننا نضع بعض التليسكوبات المتطورة مسافة بعيدة عن الأرض علشان نرصد الضوء الخارج من الارض من ألاف السنين فبالتالي هنقدر نشوف الأرض من ألاف السنين علشان الضوء دا هيكون خارج من الأرض من زمان ف احنا هنصور الأرض في الماضي بتاعها و قد اشار القران الكريم للنظرية دي في سورة الواقعة , قال تعالي {۞ فَلَا أُقْسِمُ بِمَوَاقِعِ النُّجُومِ (75) وَإِنَّهُ لَقَسَمٌ لَّوْ تَعْلَمُونَ عَظِيمٌ (76). قال بعد المفسرين بعد اكتشاف العلماء لسرعة الضوء و طريقة عملة ان في الأيه دي اشارة من الله عن الموضوع دا و ان النجوم اللي بنشوفها في السماء كل يوم هي مش موجودة حاليا في المكان دا !! لا دا مكانها من ملايين السنين و الضوء اللي خرج منها من ملايين السنين هو يدوب وصلنا فعلا سبحان الله.
طبعا الموضوع دا لو اتطبق فعلا و قدرنا اننا نشوف ماضي الأرض ف البشرية هيحصلها تطور محصلهاش قبل كدا في تاريخها و دا هيخلي البشرية تكتشف كل حاجة غامضة في الأرض لغاية وقتنا الحالي بالاضافة ان دا هيخلينا نفكر بجدية في محاولة اعمار كوكب اخر .
السؤال هنا ليه البشرية معملتش دا ؟
الاجابة ان الفكرة علميا يمكن تطبيقها لكن عمليا صعب بسبب ان مفيش اي مركبة اخترعتها البشرية تقدر تسافر في الفضاء بسرعة عالية لألاف السنين علشان تضع تليسكوب بعيد جدا عن الأرض لالتقاط الضوء الخارج من الأرض من الاف السنين ف اتمني في يوم من الايام نقدر نطبق الفكرة و بس كدا متنساش تقلنا رأيك لو عجبك و لو في اي تعديل حابب انه يتضاف.